الناجحون في الامتحانات هاد العام

الأحد 8 مايو 2016 | مملكة بريس

هاد الليمات وأنا تنتسارا ف الفايسبوك بان ليا مجموعة ديال الدراري والدريات تيبقاوا مكونيطين ف الانترنيبت اكثر من عشرة ديال السوايع وقتما حليت الفايس طالعين ليه ف الراس… المشكلة هي أن الكثير من هادوك الدراري عندهوم الباك ولا الجهوي أما اصحاب لافاك والله ما تيحشموا لا ف النقاشات ديالهوم ولا ف الأفكار ديالهوم…

الموهيم كيفما بداوا تيكتبوها هاد الدراري بان ليا باللي غادي ينجح هاد العام ف الدراسة ديالوا وف الحياة ديالو هو اللي سد داك المشقوف ديال الاورديناتور 22 ساعة وحلو جوج سوايع نص ساعة منهوم للفايس لشي حاجة جديدة ولا يمكن يتعاونا مع اصحابوا فالامتحانات ونص ساعة لشي مواقع متخصصة ف الامتحانات والتمارين والملخصات وساعة لليوتوب باش يشوف شي مقاطع لأي حاجة ما فاهماش وفايت سجلها ف دفتر خاص.. ايلا مشا بهاد الطريقة انا نضمن ليه النجاح بأكثر من ستين ف المائة خصوصا ايىلا كان كاتب الدروس والملخصات وكان تيحضر وتيناقش الدروس والتمارين…

وراه مشات بيا الذاكرة عشرين عام كيفاش كان عندنا ف ديورنا استنفار علمي كبير باش نوجدوا للامتحانات شهرين قبل من وقيتها ها اللي تيلخص ها اللي تيحرز ها اللي تيحفظ ها اللي تيمشي عند كل واحد باش يتناقش معاه ها اللي مقابل الفوطوكوبي ديال الدروس والامتحانات اللي فات داروها الناس…

ايام زمان ما كاين لا تيليفون لاا ميساجات لا فايسبوك لا واتساب وهاداك الجيل شد الاجازات ودبلومات الدراسات العليا والدكتوراة وكثير منهوم باقي ف الشوماج وعندو ما يكول… ايوا هاد الدراري اللي تالفا ليهوم الجرية ومقابلين الفايس والواتساب ومال تيعرفوا يفرقوا بين التاءمربوطة والتا مبسوطة والهمزة فوق الياء والهمزة فوق السطر وفوق الواو والألف أش غادي ينتظروا هادي واحد العشر سنين من بعد وأش غادي ينتظر منهوم المجتمع

احنا باقي لينا 20 يوم على الامتحانات الاشهادية وخوتنا وأولادنا باقي حالين فمهوم ف الاورديناتور والفايس واليوتوب وملي تسول شي واحد غير على العناوين ديال فصول وانشطة الدروس تيكوليك وايلي علاه هادشي غادي يحطوه ف الامتحان..

النصيحة ديالي هي اللي بغا مصلحتو ولا مصلحة ولا عباد الله ولا مصلحة المجتمع ايفيق وانصح اللي عندو الامتحانات باش يتحزم ليها ويراجع ليها وتنتمنى هادوك اللي تيحطو الامتحان يعطيوا صفر نقطة على اللي تيبارطاجي الأجوبة كفما هي واللي تيدير كوبي كولي لشي ورقة ديال صحابهوم… باش يفيق المجتمع كلو..