mamlakapress.com
جريدة إلكترونية مستقلة
mamlakapress.com
جريدة إلكترونية مستقلة
مهند الحربيلي : مملكة بريس
حاشاكم.. هاد الانتخابات ديال الجماعات تتبين عيوبنا وعيوب السماسرية والسياسيين والمنتخبين السابقين واللاحقين… شوفوا الشوارع ديال المدن المغربية ف هاد السبع ايام ديال الكذوب والوعود والتنافيق… كل طريق وكل زنقة وكل شارع عامر بمزيلة ديال الاوراق والكاغيط والتصاور والرموز.. وعدد كبير ديال مساخيط الوالدين مجموعين ف كل حومة شي تيفرق الاوراق وشي تيتحرش على بنات عباد الله وشي تيسب المواطنين .. ما كاين لا اداب لا اخلاق … لا صوت لاصورة…وعدد كبير من الشيخات والنكافات وعيساوة والدقايقية تيدوروا ف الطرقان باش الناس يصوتوا على المرشحين اللي مخدمينهوم …
ما كاين لا برامج لا اجراءات لا مرشحين قاريين وواعيين ف اللواائح الانتخابية …وايلا كاينين كاع تتلقاوهوم في مؤخرة اللائحة اماا الوكلاء وهادوك اللي غا ينجحوا تتلقاوا كمامرهوم ف الأول اللا يحفظنا واياكوم من شرهم…و بعض المرات تتللقاوا ف اللائحة أخطر المجرمين… وهوما اللي غادي يصوتوا عليهوم الناس بالقرفية والزرقة والدجاج والمرقة …
وراه لسان الحال ديال المواطن العاقل… اللي قاهراه الوقت وتيعاني مع الزمن ..تيكول هاد الليامات تابعاني مصاريف العيد الكبير ومصاريف المدرسة والحوايج ..وانا بعدا ما غاديش نصوت على المرشح اللي الاوراق ديالوا دايرين لينا الزبل ف الطريق… وما غاديش نصوت على شي مرشح صدعت لي راسي شي جوقة تابعة ليه… وما غاديش نصوت على شي مرشح خدامين معاه البراهش والدراري الصغار ما عارفين اش هازين بين ايديهوم من كذوب غادي يضيع مستقبلهوم… وما غاديش نصوت على شي مرشح مخدم العيالات والبنات باش يجلبوا ليه المصوتين.. وما غاديش نصوت على المرشح اللي متعاونين معاه السماسرية ديال الأصولت والمقاطعات.. وما غاديش نصوت على المرشح اللي تيتعاون معاه القايد ولا المقدم ولا الشيخ… وما غاديش نصوت على شي مرشح أمي واخا يكون واعي…وما غاديش نصوت على شي مرشح فايت ستين عام… وما غاديش نصوت على شي مرشح باقي صغير واباه كان منتخب.. وما غاديش نصوت على شي مرشح كان مسؤول وما دار والوا ف المقاطعة ديالو..
وراه تيبان لينا ما كاين غير هادوك النماذج … وراه الصوت ديالي امانة ..ما غادي نعطيها غير اللي تيستحقها… وما غاديش نسمح ليه فيها لا ف الدنيا ولا ف الآخرة..وراه اللي ما عارف يسير حياتوا والعمل ديالوا وما عارف يقدم للبلاد شي حاجة فيها الفايدة بلا الانتخابات … راه ماعمرو يعمل شي حاجة مزيانة ملي غادي يكون مسؤول… عقلوا على هاد الكلام… ونصيحتي ليكوم سيروا صوتوا على الحزب اللي غادي يمكن واقيلا يقدر يحاول يبدا يعرف كيفاش يتعامل مع الناس اللي غادي تكون عندهوم النية ديال ما باقيش يفكروا ينهبوا ويستغلوا بزاف ديال الثروات وتكون عندهوم النية باش يعطيوا شويا ديال الحقوق للموالطنين. ويحافظوا على الاستقرار ديال الوطن باش يستمر الخير شي خمسين عام عليهوم ….
